Archive for June 3, 2014

தும்பைச் செடியின் வாசம்
கொளிஞ்சிப்பூ வாசம்
பிடுங்கப்பட்ட கடலைச்செடியின் வேர் வாசம்
கட்டிக்கேந்தியின் இலை வாசம்
பத்திரகாளியம்மன் கோவில் சன்னதி வாசம்
முருங்கை இலை வெண்ணெயுடன் தாளிக்கும் வாசம்
அவித்த பனங்கிழங்கின் வாசம்
அப்பாவின் வியர்வை கலந்த சட்டை வாசம்
பழைய புத்தகத்தின் வாசம்
தக்காளிச் செடி வாசம்
மண்ணெண்ணெய் வாசம்
கோடைமழையின் முதல் வாசம்
மளிகைப்பெட்டிக்குள் அம்மா மறைத்து இடும் நாணயத்தின் வாசம்
கோகுல் சாண்டல் பவுடர் வாசம்
ஆட்டுக்கால் சுடும் வாசம்
காலடியில் கிடக்கும் ஆட்டுக்குட்டியின் வாசம்
-என்று வாசனை தின்னும் முருகம்மாள்
ஜலதோசத்தில் கிடக்கிறாள் இரண்டு நாட்களாய்
அம்மா வைத்த மிளகு ரசத்தைக்கூட நுகரமுடியாமல்..

Advertisements